آيب’نين تشببوثو ايله مليحه عزيزپور ون "منه بير كوچه باغيشلا" آدلي كيتابي چاپا وئريلدي
یازار : Mesud Haray
آذربايجان يازيچي‌لار بيرليگي‌نين گونئي آذربايجان شعبه‌سي‌نين تشببوثو ايله، مليحه عزيزپورون "منه بير كوچه باغيشلا" آدلي كيتابي چاپا وئريلدي. قئيد ائدك كي، بو كيتاب شعبه‌نين گونئي آذربايجان ادبياتي سئرياسي‌نين 13-جو و مليحه خانيمين ايكينجي كيتابي‌دير
مليحه عزيزپور 1979جو گونش ايلينده اهر شهرينده دوغولدو، بوتون تحصيل ايللريني تبريزده كئچيردي و سونودا پسيكولوژي بؤلومونده ليسانس آلدي. 17 ياشيندان بري شعر يازماغا باشلاييب، ياغمور آدلي بيرينجي شعر توپلوسونو 2002 جي ايلده تبريزده چاپ ائتديردي و اونون آردينجا دمير سئوگي، ياساق دويغولار، گؤي گؤزلو تانري و سو پيچيلتي سي آدلي شعر توپلولاريني ايران و خاريجده چاپا يئتيردي. آغ گئجه آدلي حئكايه جيكلر توپلوسو و 14 قلم بزنميش آي آدلي باشقا قيسا شعرلر توپلوسو دا چاپا حاضيرديرلار.
اؤيرنجي اولدوغوندان بري فرقلي قزئت و نشريه لرله علاقه ده اولوردو و اونلارين توركجه صحيفه لريني هابئله اوشاق بؤلوملريني اداره ائديردي. او 2003 جو ايلدن بري قاريشقا آدلي اوشاق درگيسيني يايينلاماق اوچون مجوز آلماق ايسته دي آنجاق ارشاد اداره سي ايللر بويو سوروندورندن سونرا مجوز وئرمه دي.
مليحه عزيزپور احرار، عصر آزادي، مهر بناب، آواي ميشو، اولدوز، آسان، نسيم قره داغ، آفتاب آذربايجان، آذرتورك، سهيل و ... نشريه لرله امكداشليق ائديردي كي سون زامانلار قزئته لرده چاليشماقدان محروم ائديلدي و ايندي ليك توركيه ده ياشايير.
بيرگون، يا بير آخشام اوستو
تبريزين هانسي سا خياوانيندان اؤته‌جه‌ييك
من گؤزلريندن اوغورلوق ائدركن
آرخادان وورولاجاغام
سن بيلمه‌يه‌جكسن
يئنه، هانسي سا «خان» قورشون يئيه جك
هانسي سا «بَي» آسيلاجاق
هانسي سا «عمي» بوغولاجاق
يئتيم قالميش شعرلريمده
وسن
باتوم گؤينرتيسيني اودقوناجاقسان كوره‌يينده
تپيك سانجيسيني سوساجاقسان بؤيرونده
گؤزلريني گيزلينجه سينه سيله جكسن
و من
***
مني آلماليقدا قويلارسان نه اولار؟
ديشلنمه‌ميش آلما قويارسان باش داشيما
و مزار داشيمدا يازارسان
آلمالارين يئييلمه‌مه‌سيني
آلمالار اييله‌مك اوچون يئتيشيرلر
